Rusiye Baş prokuraturası Kanada Yerli teşebbüslerge qol tutuv fondunıñ faaliyetini memlekette istenilmegen dep ilân etti, dep yaza Azatlıq Radiosı.
Müessiseniñ bildirgenine köre, teşkilât Kanada tış işler ve halqara ticaret nazirliginiñ operativ idaresi altında buluna. "Dünyanıñ 120-den ziyade memleketinde Ottavanıñ menfaatları ve prioritetlerini temin etken leyhalarğa para bere, şu cümleden LGBTI ekstremist cemiyetine qol tutuv", — dep bildirdi prokuratura.
Baş prokuratura fondnı "Rusiyeniñ menfiy suretini şekillendirmek içün teşviqat faaliyetini alıp barğanında" qabaatlağan.
Kanada Yerli teşebbüslerge qol tutuv fondı er yıl çeşit memleketlerde tahminen 650 leyhanı maliye ete, olarnıñ arasında yerli saylav közeticileriniñ ögrenilmesine de yol açqanlar bar. Fond civil cemiyet teşkilâtlarına da yardım ete.
