161 bala Rusiyeniñ Ukrainağa qarşı silâlı ücümi neticesinde can berdi, daa 264 bala yaralandı. Bu aqta aprelniñ 4-nde Ukraina Baş prokurorınıñ ofisi haber etti.
«Faal cenk ketken yerlerde ve vaqtınca işğal etilgen topraqlarda zarar körgen balalarnen bağlı malümat alına. Hususan, Mariupol şeerinde, Kyiv, Çerniğiv ve Lugansk vilâyetleriniñ ayrı topraqlarında», – dep aytıla haberde.
Baş prokurornıñ ofisi Aprelniñ 2-nde 9 yaşında bala Donetsk vilâyetiniñ Ugledar şeerine açılğan ateş vaqtında yaralandı, aprelniñ 3-nde Mıkolayıv şeerine qarşı açılğan ateş vaqtında aralarında bir bala olğan 11 insan yaralandı, aprelniñ 3-nde Harkivde üç bala yaralandı, dep qayd ete7
Bombardıman ve ateş sebebinden 869 oquv yurtu zarar kördi, 83-ü bütünley viran etildi, dep bildire Ukraina akimiyeti.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
