Rusiyeniñ Ukrainağa ücüm etkeni sebebinden 143 bala vefat etti, 216 bala yaralandı. Bu aqta Ukraina Baş prokurorınıñ ofisi martnıñ 28-nde saba bildirdi.
«Eñ çoq bala Kyiv vilâyetinde – 67, Harkiv vilâyetinde – 49, Donetsk vilâyetinde – 53, Çerniğiv vilâyetinde – 38, Mıkolayıv vilâyetinde – 30, Lugansk vilâyetinde – 27, Zaporijjâ vilâyetinde – 21, Herson vilâyetinde – 24, paytahtta – 16, Jıtomır vilâyetinde – 15 ve Sumı vilâyetinde – 14 zarar kördi», – dep aytıla haberde.
Baş prokurornıñ ofisi malümatına köre, Ukrainada bombardıman ve ateş neticesinde 733 oquv yurtu zarar kördi, 74-ü bütünley viran etildi.
«Bu malümat tam degil, çünki faal cenk ketken rayonlarda ve vaqtınca işğal etilgen topraqlarda ateş açılğan yerlerni baqmağa imkân yoq», – dep qoştı prokuratura.
Bundan evel Baş prokuror ofisi 139 balanıñ ölümi ve 205 balanıñ yaralanğanı aqqında bildirgen edi.
Ukrainağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Mesken rayonlarğa top, çoqlu ateş sistemaları ve ballistik raketalar vastasınen ateş açıla. Rusiye ordusınıñ zırhlı tehnikası Kyiv ve Rusiye sıñırına yaqın bir qaç vilâyet merkezini sarıp almağa tırışa.
Rusiye Ukrainağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3enufiq6nhnir.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
