Rusiyeniñ Ukrayinağa keniş mıqyaslı istilâsı neticesinde ölgen balalarnınh sayısı 215-ke yetti, dep bildire Ukrayina Baş prokurorınıñ ofisi aprelniñ 25-nde.
İdareniñ malümatına köre, arbiy areketler sebebinden 391 bala yaralanğan.
Bu raqamlar tam degil, çünki faal cenk areketleri, vaqtınca işğal etilgen topraqlar ve azat etilgen topraqlarda iş devam ete.
Prokurorlarnıñ malümatına köre, eñ çoq zarar körgenler:
- Donetsk vilâyeti – 124
- Kıyiv vilâyeti – 114
- Harkiv vilâyeti – 93
- Çerniğiv vilâyeti – 66
- Mıkolayıv vilâyeti – 43
- Herson vilâyeti – 44
- Lugansk vilâyeti – 37
- Zaporijjâ vilâyeti – 27
- Kıyiv – 16
- Sumı – 17
- Jıtomır – 15
Haber etilgeni kibi, aprelniñ 24-nde Donetsk kvilâyetinde Rusiye arbiyleriniñ Krasnogorivkanı ateşke tutması neticesinde 5 ve 14 yaşlı eki qız öldi.
Arpelniñ 23-nde Odesanıñ ateşke tutulması neticesinde 8 adam öldi, olarnıñ arasında üç yaylıq bala.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
