Ukrayinada Rusiye istilâsı neticesinde 537 bala elâk oldı, 1269 yaralandı, dep bildire Baş prokuror ofisi.
Müessisede hatırlatalar ki, martnıñ 27-nde Harkiv vilâyetiniñ Borov köyünde Rusiye ücüminde 12 yaşında oğlançıq elâk oldı, Harkivniñ ateşke tutulması neticesinde üç aydan 13 yaşına qadar 4 bala zarar kördi.
Qanun qoruyıcılar, cenkte zarar körgen balalar aqqında malümat tam olmağanını qayd eteler, çünki cenk areketleri keçirilgen yerlerde, em de vaqtınca işğal etilgen ve azat etilgen topraqlarda olarnı belgilemek içün iş devam ete.
Eñ çoq Donetsk vilâyetinde – 524, Harkiv vilâyetinde – 343, Herson vilâyetinde – 149, Kıyiv vilâyetinde – 130, Dnipropetrovsk vilâyetinde – 125, Mıkolayiv vilâyetinde – 103, Zaporojjâ vilâyetinde – 100 bala zarar körgen.
Rusiye arbiyleri çeşit silâlardan dron, raketa, Zalp ateşiniñ reaktiv sistemalarından Ukrayina regionlarına muntazam surette ücüm ete.
Moskva, isbat ve şaatlıqlarğa baqmadan, tam miqyaslı istilâ başlağanından berli Ukrainada vatandaşlarğa ateş açılğanını red ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
