Qırımnıñ işğali vaqtında Rusiye 30 biñge yaqın ukrainni öz ordusına çağırdı. Bunı iyülniñ 6-nda «Ukraina 30» bütünukraina forumı vaqtında Ukraina Tış işler naziriniñ birinci muavini Emine Ceppar ayttı.
«Kreml, ordusını daa büyük yapmaq içün yarımadanıñ ukrain ealisini qullanıp, halqara gumanitar uquqnı boza. İşğalniñ başından otuz biñge yaqın Ukraina vatandaşı Rusiyege arbiy hızmetke celp etildi», – dedi Ceppar.
Onıñ bildirgenine köre, Rusiye Qırımnıñ riayetkâr olmağan ealisini sıqıştırıp çıqara ve olarnıñ yerine yarımadağa Rusiye vatandaşlarını avuştıra.
2021 senesi Avropa Parlamenti Rusiye işğal etken Qırımda insan aqlarınıñ bozuluvını takbih etken qararğa qoltuttı.
Qırımnıñ askeriyleştirilüvi
2014 senesi Qırım işğal etilgen soñ Rusiye yarımadada ve Qara deñizde muntazam sürette arbiy talimler keçire, arbiy tehnikanı, hususan uçaqquvar mudafaa sistemasını ketirip qoya.
2018 senesi yanvar ayında Fiolent burnunda S-400 Rusiye uçaqquvar-raketa kompleksleri arbiy nevbetçilikke başladı. Sentâbr ayında bunıñ kibi kompleksler Kezlevde de yerleştirildi. 2018 senesi noyabrniñ soñunda ise Canköyde S-400 uçaqquvar-raketa kompleksiniñ dörtünci divizionı arbiy nevbetçilikke başladı.
Ukraina Baş ştabı, Rusiye arbiyleriniñ Qırımda yapqanlarını qanunsız dep adlandıra.
Ukrainanıñ BM daimiy vekiliniñ muavini Yuriy Vitrenko, Rusiye yarımadada nükleer silâsını yerleştirgeninden qorqqanını bildirdi. Ukraina Milliy telükesizlik ve mudafaa şurasınıñ kâtip muavini Serğiy Krıvonis, Qırımda nükleer silâsı olması mümkün bir qaç yer bar, dep bildirdi. Onıñ fikirince, onıñ yarımadada yerleştirilüv ihtimali «ğayet büyüktir».
2020 senesi dekabr ayında Kreml temsilcisi Dmitriy Peskov Rusiyeniñ Qırımda «telükesizligi içün er şey yapmağa aqqı bar», dep bildirgen edi.
BM Baş Assambleyası 2019 senesi dekabr ayında Rusiyeni işğal etilgen Qırımdan ordusını çıqarmasına ve Ukraina topraqlarınıñ vaqtınca işğalini toqtatmasına çağırğan qararnı qabul etti.
