Ukrayina TİN yolbaşçısı Dmıtro Kuleba Rusiyeniñ Kremençuktaki ticaret merkezine raketa darbesi endirmesine cevap berip, Rusiyege "insanlıqnıñ ayıbı" dedi.
"Kremençukta yüzlernen tınç sakininiñ olğan balaban ticaret merkezi Rusiye darbesinden zarar kördi. Rusiye insañlıqnıñ ayıbıdır ve o mesüliyetke çekilmeli. Cevap Ukrayina içün daa çoq ağır silâlar, Rusiyege qarşı daa çoq sanktsiyalar olmalı", - dep yazdı o.
Kremençukta Rusiyeniñ ticaret-eglence merkezine raketa ücümi neticesinde eñ azı 10 adam öldi, 40-tan çoq yaralandı.
Evel Volodımır Zelenskıy Kremençukta Rusiye raketası barıp urğan ticaret-eglence merkezinde biñden çoq adam buluna bilecegini bildirdi.
Poltava vilâyetiniñ arbiy memuriyetiniñ başı Dmıtro Lunin ticaret merkezine raketa darbesiniñ endirilmesine "ruslarnıñ insanlıqqa qarşı daa bir arbiy cinayeti" dedi.
Rusiye arbiyleri kremunçuktaki ticaret merkezine ücümni daa izaatlamadılar.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
