Birleşken Milletlerniñ Halqara mahkemesi yanvarniñ 31-nde Qırım ve Donbas işğali vaqtında Rusiyeniñ Terrorizmniñ maliye etilüvinen küreş ve ırqiy ayırım şekilleriniñ yasağı şartnamesini bozğanına dair davasında qararını ilân etti. Rusiye devlet olaraq ilk sefer «halqara uquq bozucısı» olaraq tanıldı, dep ayta Ukrayına Tış işler nazirliginiñ hususiy emirler elçisi Anton Korınevıç, bu qararnı «tarihiy» dep adlandırıp.
«Bundan evel Rusiye Federatsiyasınıñ halqara uquqnı bozğanına dair bir qarar dünyanıñ yüksek mahkeme organında yoq edi. Bundan ğayrı, Ukrayına Rusiyege qarşı dava açtırğan eki davanıñ Şartnamesini de bozdı. Bu uquqiy iş içün müim ola», – dep ayttı Anton Korınevıç Qırım.Aqiqat Radiosınıñ yayınında.
Ukrayına, Rusiye Ukrayına şarqında terror faaliyetini maliye ete, dep bildirgen edi. BM Halqara mahkemesi talaplarnıñ kiçik qısmını taqdirlep, Rusiye Birleşken Milletlerniñ Terrorizm maliye etilüvine mania şartnamesiniñ bazı maddelerini bozğan, dep qarar çıqardı. Mahkeme Ukrayına terroristik dep adlandırğan gruppalar kerçekten terroristik sayılamı dep qarar çıqarmaq içün yeterli delili yoq, dep bildirdi. Ukrayınağa tazminat berüvde menfiy cevap berildi. Mahkeme Rusiyeniñ 2014 senesi tüşürgen MH17 seferiniñ yolcu uçağı içün mesüliyetinen bağlı qarar çıqarmadı.
Ukrayınanıñ diger talafları Qırım işğalinden soñ qırımtatar ve ukrayınlerniñ basqığa oğramasınen bağlı edi. Mında da talaplarnıñ bir qısmı qabul etilmedi, amma Rusiye Bütün ırqiy ayırım şekilleriniñ yoq etilüvine dair şartnamesiniñ bozucısı olaraq tanıldı. Hususan Qırımtatar Milliy Meclisini yasaq etkeni ve işğal altındaki Qırımda ukrayınlerniñ ana tilinde tasil aluv aqlarını bozğanı içün.
«Bazı talaplarnıñ yerine ketirilmegeninde büyük mesele körmeyim, çünki biz er vaqıt mümkün olğanı qadar çoq dava açamız. Şübhesiz, BM Halqara mahkemesiniñ evelki qararlarına baqıp, Halqara mahkeme taraflarnıñ dava talaplarını bütünley qabul etmegenini köre bilemiz. Men bu qararnıñ müsbet taraflarına emiyet berdim», – dep ayta Anton Korınevıç.
Fevralniñ 2-nde berilgen malümatqa köre, Gaagadaki BM Halqara mahkemesi Ukrayınanıñ Rusiyege qarşı «genotsid añlamını bozğanına» dair davasınıñ yurisdiktsiyasınen bağlı ilk qarar qabul etti. Mahkeme bu dava «ileride temelden baqıla bile», dep qarar çıqardı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
