Ukraina ve Rusiye arasında muzakerelerniñ ekinci raundı bugün, martnıñ 3-nde, ötkerilecek. Bu aqta «Sluğa narodu» fraktsiyasınıñ lideri David Arahamiya Facebook saifesinde bildirdi.
«Eki saattan soñ başlaymız. Eñ azı – gumanitar ayatlar. Qalğanı – vaziyetke köre», – dedi Arahamiya.
O, muzakereler keçirilecek yerni aytmadı, amma Belovejskaya Puşça olmaycaq, dep bildirdi.
Rusiye Federatsiyasınıñ körüşüv iştirakçisi, Rusiye prezidenti Vladimir Putinniñ yardımcısı Vladimir Medinskiy ateş toqtatılmasından ğayrı Rusiye silâlı quvetleri ücüm etken şeerlerde gumanitar ayatlar meselesini de muzakere etecek.
Ukraina prezidentiniñ ofisi Ukraina eyyeti muzakereler keçirilecek yerge «kete», dep tasdıqladı. Medinskiy, Ukraina eyyeti Kyivden çıqtı, dep bildirdi.
Birinci raund fevralniñ 28-nde oldı. Ukraina prezidentiniñ ofisi, Ukraina-Beyazrusiye sıñırı rayonında körüşken Ukraina ve Rusiye eyyetleri «ateşni ve cenk areketlerini tez toqtatmaq içün ortaq noqtalarını tapmaq maqsadınen» muzakereler keçirdi, dep haber etti.
Fevralniñ 24-nde saba saat 5-te Rusiye prezidenti Vladimir Putin «DNR» ve «LNR» gruppirovkalarınıñ «muracaatından» soñ Donbasta «mahsus operatsiya» başlatqanını ilân etti. Bundan soñ Kyiv, Harkiv, Odesa, Kramatorsk, Berdânskta patlav ve raketa darbeleri aqqında haber etildi.
Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire. Başta Rusiye arbiyleri ölgenini inkâr ettiler. Amma fevralniñ 27-nde Rusiye Federatsiyası Mudafaa nazirliginiñ resmiy vekili İgor Konaşenkov Ukrainada ölgen ve yaralanğan Rusiye askerleri bar, dep ayttı. Sayısını aytmadı.
Ukraina prezidenti Volodımır Zelenskıy umumiy seferberlik buyruğını imzaladı. Ğarp memleketleri Ukrainağa yapılğan ücüm sebebinden Rusiyege qarşı yañı sanktsiyalarnı qullanıp başladı.
Doğrudan ücümge baqmadan, Kreml Ukraina işğali niyetini inkâr ete. Rusiye Mudafaa nazirligi Ukraina tarafınıñ tüşürilgen Rusiye uçaqları, patlatılğan zırhlı tehnika, Rusiye arbiyleriniñ ölümleri aqqında malümatını red ete ve Ukraina şeerlerine ateş açılmay, dep bildire.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
