Rusiye Tış İstihbarat Hızmetiniñ (TİH) müdiri Sergey Narışkin NATO memleketlerini "Rusiye sıñırlarında arbiy faallikni arttırğanında" qabaatladı, Poloniya ve Baltıq memleketlerini ise, Moskvanıñ Şimaliy atlantik ittifaqdaşlıq ile çatışması taqdirinde "birinci zarar körgenler" olacaq dep adlandırdı. Bu aqta Narışkin çeçek ayınıñ 15-nde Belarusniñ paytahtı Minskte Aleksandr Lukaşenko ile subetinden soñ bildirdi, dep haber ete "BELTA" agentligi.
Sergey Narışkinniñ aytqanına köre, Poloniya ve "Baltıq cumhuriyetleri" artqaç tezavuzınen başqaları arasında ayırılıp turalar. Naryşkin, Poloniyanıñ Belarus ve Kaliningrad vilâyetiniñ sıñırlarında eki millionğa yaqın tanklarğa qarşı mina qoyma planlarını ve Varşavanıñ "amerikalılardan daa özek silâsını almaq istegenini" misal olaraq kösterdi.
"Olar añlamaq kerekler ki, Şimaliy atlantik ittifaqnıñ ittifaqdaş devletke (Rusiye ve Belaruske—QA) qarşı istilâsı olsa, elbette ki, bütün NATO blokuna zarar ketirilecek, amma eñ çoq zarar körgenler — bu kibi ğayelerniñ taşıyıcıları, Poloniya ve Baltıq memleketleriniñ siyasiy dairelerinde olğanlar", — dedi Rusiye memurı.
Çeçek ayınıñ başında Litvaniya tış işler naziri Kâstutis Budris, NATO-nıñ Belaruste Ğarp-2025 talimlerine cevabı Rusiye ve Belarusniñ celp etken küç ve vastalarınıñ miqdarına bağlı olacaq, dep bildirdi.
2022 senesi kiçik ayda Rusiyeniñ Ukrayinağa tam mıqyaslı istilâsı Belaruste eki memleketniñ ortaq talimleri yekünlengen soñ başlanğan edi. Rusiye ordusı Ukrayinağa, şu cümleden Belarus territoriyasından da kirgen edi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3454ggyqnys2v.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
