Ukrayına BM Baş Assambleyasınıñ eki qararını ileriletecek. Birincisi Barışıq formulasınen, ekincisi Rusiyeniñ cenk sebebinden mesüliyetke çekilmesinen bağlı. Bu aqta Ukrayına Tış işler naziriniñ birinci muavini Emine Caparova bildirdi, dep haber ete Ukrinform.
«Bu yıl eki esas qararda diplomatik ğayretlerimizni kösterecekmiz. Fevral ayında ilk adım – Barışıq formulasıdır. Ekinci adım Rusiye Federatsiyasınıñ mesüliyeti olacaq», – dep ayttı o, BM merkezinde.
Barışıq formulasına dair qarar metni Ukrayına ortaqlarınen keliştirilecek, dep ayttı Caparova: «Ğaye Barışıq formulasınıñ ğayesini, maddelerini, baqış ve felsefesini pekitmekten ibarettir. Ümüt etemiz ki, fevralniñ soñunda büyük istilânıñ yılı munasebetinen baqılır».
Bütün barışıq muzakereleri tek Rusiye ordusı Ukrayınadan çıqarılğan soñ ola bile, dep qayd etti nazir muavini. «Barışıq formulası – baqışımıznıñ temeli, amma Ukrayına menfaatları sayesinde er angi añlaşmanı imzalamağa azırmız demek degil», – dep qayd etti Ukrayına Tış işler nazirliginiñ vekili.
«Bizni bir neticege – topraq bütünligi ve halqımız içün barışıqqa ketirgen er angi barışıq muzakereleriniñ tarafdarı olamız», – dedi o ve Ukrayına toprağını satmaycaq, dep qayd etti.
Caparova, Halqara ceza mahkemesi Ukrayınada yapılğan arbiy cinayetler, insanlıqqa qarşı cinayetlerni ve genotsid cinayetlerini endi baqa, dep hatırlattı.
«Amma istilâ cinayeti aqqında aytsaq, Rusiye siyasiy reberligini mesüliyetke çekecek mahsus mahkeme qurulmalı ve mahsus halqara mehanizm başlatılmalı, dep tüşünemiz. Şimdi qarar metni üzerinde çalışamız», – dep qoştı o.
Caparova, «Rusiye Federatsiyasınıñ Ukrayınağa qarşı zalımca köstergen küç aqqı mında olğan er keske bir signal bere: artıq kimse telükesizlikte degil».
«Mesüliyeli olğan bütün devletlerni qararğa qoltutmalarına çağıramız… Bugün yapacağımız budır – istilâ cinayetlerini tedqiq etecek mahsus mahkemeni qurmaq», – dep ayttı diplomat.
BM malümatına köre, Rusiye Federatsiyasınıñ Ukrayınağa qarşı büyük istilâsı neticesinde 6952 insan elâk oldı, 11144 vatandaş yaralandı. Rusiye bir sıra delil ve şaatlıqqa baqmadan, vatandaşlarğa ücüm etkenini inkâr ete.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
