Rusiye İç işler naziri Vladimir Kolokoltsevniñ bildirgenine köre, 2019 senesi Ceza kodeksiniñ 282-nci maddesi qısmen yımşatılğan soñ nefret ya da duşmanlıq doğuruv davalarınıñ sayısı onlarnen qat eksildi. Bu aqta o, «İnterfaksqa» tarif etti, dep bildire Azatlıq Radiosınıñ rus bürosı.
Rusiye naziriniñ bildirgenine köre, aqımdaki seneniñ yanvar ayından mart ayına qadar bu madde boyunca 9 dava açıldı, keçken seneniñ ilk üç ayı içinde ise 223 dava açılğan edi.
2018 senesiniñ soñunda qabul etilgen qanunğa binaen, nefret doğuruv maddesindeki areket ilk sefer yapılğan olsa, memuriy ceza berilmeli. Cinaiy iş tek tekrar yapılğan bozuv içün açıla.
Maddedeki mesüliyetniñ yımşatıluvını aq qorçalayıcılar ve bir sıra siyasiy ve cemaat erbapları çoq talap etken edi. Olar cinaiy davalar artqanını qayd etip, içtimaiy ağlarda ekstremist tanılğan yazılarnıñ paylaşuvı içün de davalar açıla, dep aytqan edi.
Rusiye işğal etken Qırımda Rusiye quvetçileri ekstremizm maddesi boyunca faal ve jurnalistlerni tuta ve apiske ala. 282-nci madde içtimaiy ağlardaki begenüv ve paylaşuvlar, internetteki yazılar içün qullanıla.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
