Rusiye iş adamı Böris Rotenbergge ait olğan "Mostotrest" şirketi Keriç köprüden demiryol naqliyatınıñ baqımı içün hızmetler kösterilmesine devlet muqavelesini alğan.
Muqaveleniñ miqdarı 204,5 million rubleni teşkil ete. Bunıñ aqqında malümat Rusiye devlet satın almaları portalında yerleştirilgen.
"Mostotrest", 2020 senesi dekabrde olıp keçken tenderniñ yekâne iştirakçisi olğan. Añlaşmağa köre, şirket, 2021 senesiniñ iyün 30 qadar "suniy inşaatlarnen beraber mal kompleks saqlanuvınıñ demiryol naqliyatı keçüviniñ bir yıllıq telükesiz ve daimiy işlevini temin etmeli".
Muqavele çerçivesinde "köpür astında ve köpür yanındaki ot çaluvı, suv astındaki tayanğıçlarnıñ dalıcılıq tetqiqiniñ keçirilüvi".
Ukraina Tış işler naziriniñ birinci muavini Emine Ceppar AB daimiy vekiller komitetine Ukraina topraq bütünligini ve suverenitetini bozuv, hususan Keriç köprü qurucılığı ile bağlı şahıs ve teşkilâtlar cedvelini kenişletmek qararını qabul etkeni içün teşekkürler bildirdi.
AB elçileri Keriç köprüniñ qurucılığı içün eki şahıs ve dört şirketke qarşı sanktsiyalarnı tasdıqladı.
Daa evel berilgen malümatqa köre, Qıbrız Keriç köprü qurucılığı sebebinden kirsetilgen Avropa Birligi sanktsiyalarını blok ete. AB, bu köpürni qurğan şirketlerge qarşı sanktsiyalarnı 2018 senesi iyül ayında kirsetti.
İyünniñ 18-nde Ukraina Tış işler naziri Dmıtro Kuleba bildirgenine köre, Avropa Birligi Şurası Qırım işğali sebebinden Rusiyege qarşı sanktsiyalarnı bir yılğa uzattı.
Sanktsiyalar 2014 senesi Rusiyeniñ yarımada işğaline cevap olaraq kirsetildi. O vaqıttan berli bir qaç kere uzatılıp kenişletilgen edi.
Keriç boğazındaki köpürniñ maşina qısmı 2018 senesi mayıs ayında yengil maşinalar içün açılğan edi, daa soñra yük maşinalarınıñ areketi başlatıldı. Köpürniñ demiryol qısmı daa azır degil.
2019 senesi dekabr ayında Rusiye prezidenti Vladimir Putin köpürniñ tren areketini başlattı.
Ukrainanıñ beşinci prezidenti Petro Poroşenko Rusiye işğal etken Qırımda Keriç köprüniñ qanunsız qurucılığı Kremlniñ halqara uquqqa emiyet bermegeniniñ daa bir delili ola, dep bildirgen edi.
