Kyivde Rusiye elçihanesiniñ binası ögünde «Rusiye içün Ukrainanıñ ilk gumanitar konvoyı» adlı aktsiya keçirildi. Qırım.Aqiqat mühbiriniñ bildirgenine köre, onlarnen kyivli «rusiyelilerge maddiy ceetten yardım etmek içün» Rusiye elçihanesine unitaz, ayaqyol kâğıtı, iç çamaşırını ketirdi.
Faaller Rusiye Arbiy-deñiz quvetleriniñ «bayrağını» ve «Unitaznı aluv» medalini yaptı.
«Ğaydamaka», «Sapfir» ve «Titan» ukrain buksirleri FSB zapt etken gemilerni Qırımdan alıp, noyabrniñ 20-nde aqşam esas Ukrainağa keri qaytardı.
Ukraina prezidenti Volodımır Zelenskıy noyabrniñ 21-nde gece Mıkolayıv vilâyetiniñ Oçakiv deñiz limanında Ukraina arbiy katerleri ve buksiriniñ qaytarılmasını tebrikledi.
Onıñ aytqanına köre, qaytqan gemilerni üç ay tamir etecekler.
Ukraina Arbiy-deñiz quvetleriniñ komandanı İgor Voronçenko gemiler Qırımdan qaytqan soñ andan unitazlar ve teşiklikler hırsızlandı, dep bildirdi.
Rusiye FSBsi ukrain gemilerine «zarar ketirgenini» inkâr ete.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, berilgen malümatqa köre, üç Ukraina arbiy gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Ukraina deñizcileriniñ 6 yılğa qadar azatlıqtan marum qalması mümkün edi.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
