Oktâbrniñ 28-nde gece Rusiye Federtsiyasınıñ aviatsiya küçleri 16 ava bombasını Herson vilâyetine attı, dep bildirdi «Cenüp» Operativ komandanlığınıñ birleşken matbuat merkeziniñ reberi Natalâ Ğumenük Ukrayına telemarafonı yayınında.
«Esas kerginlikni duşman avadan yapmağa devam ete. Kene taktik aviatsiya qullanıla. (Dnipronıñ – QA) sağ tarafınıñ bombardımanı toqtamay. Suvğa yaqın meskenler ava bombalarından zarar köre, gece duşman daa 16 danesini attı. Umumen uruş kününde Herson vilâyetiniñ mesken yerlerine 27 bomba atıldı», – dep ayttı Ğumenük.
Onıñ aytqanına köre, Rusiye ordusı avadan basqı yapmağa devam ete, çünki «qarada üstün degil ve Ukrayına Mudafaa quvetlerini bu şekilde toqtatmağa tırışa».
«Duşman cebede qullanğan terror vastaları», – dep qayd etti «Cenüp» operativ komandanlığı.
Onıñ bildirgenine köre, Rusiye ordusı dron qullanıp, ücüm etmege devam ete.
«Tünevinki adisede (oktâbrniñ 27-nde – QA) Mıhaylivkada mustaqil evde dron pencerege keldi ve esli-başlı çift yaralandı, bunı bütün dünya takbih etmeli», – dep qayd etti Ğumenük.
Onıñ bildirgenine köre, Rusiye ordusı «mesken yerlerde insanlar olğan yerlerni qıdırıp, dronlardan» parça-parça etken silâ qullanmağa devam ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
