Rusiye Havfsızlıq şurasınıñ kâtibi Nikolay Patruşev aprelniñ 14-nde işğal etilgen Qırımda keçirgen toplaşuvda yarımadada «Ukraina mahsus hızmetleri terakt ve diversiyalarnı yapmağa tırışa», dep bildirdi.
«Ukraina mahsus hızmetleri ve ekstremist teşkilâtları devlet sıñırında provokatsiyalar yapa, Qırımda, birinciden infrastruktura ve yaşayış obyektlerinde diversion-terror aktsiyalarını kerçekleştirmege tırışa», – dep bildire Patruşevniñ aytqanlarını «İnterfaks».
Onıñ bildirgenine köre, terror telükesiniñ artması «Ukrainanıñ agressiv, Rusiyege qarşı siyasetinen» bağlıdır. Patruşevniñ fikirince, Ukrainanıñ «Hizb ut-Tahrir al-İslami ve İyegova şaatları teşkilâtlarınıñ gizli bölüklerini şekillendirmesinde» yer ala.
Ukraina tarafı Patruşevniñ aytqanlarına daa cevap bermedi.
Soñki vaqıtları Rusiye Donbasnıñ işğal etilgen qısmında gibrid küçleriniñ cenk areketlerini arttıra. Böylece, ateşkes rejiminiñ şartları bozula, amma Rusiye Ukraina ordusını qabaatlamağa tırışa. Bundan ğayrı, Qırımda ve Ukraina sıñırı yaqınlarında Rusiye askerleriniñ sayısını arttıruv Kyiv ve ğarbiy ortaqlarınıñ qasevetini doğura, çünki Rusiye ordusınıñ Ukrainağa açıq ücüm imkânı bar.
Ukrainanıñ ğarbiy ortaqları (ABD ve AB) ve NATO oña qol tutqanını bildirdi.
Kreml, Rusiye ordusınıñ Rusiyede areket etmesi diger memleketlerni, hususan Ukrainanı qasevetlendirmemeli.
Qırımnıñ Rusiye tarafından işğal etilüvi
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
