Mayısnıñ 30-na keçer gecesi Rusiye arbiyleri Harkiv ve vilâyetine qarşı umumen sekiz raketa uçurdı. Bu aqta yerli akimiyeti bildire. Yanğınlar çıqtı, yaralanğanlar bar.
Harkivde gece darbesi neticesinde dört insan yaralandı, dep haber etti şeer yolbaşçısı İgor Terehov. Onıñ malümatına köre, Rusiye arbiyleri şeer rayonlarından biriniñ kritik infrastrukturasına qarşı darbe endirdi. Patlav yerinde yanğın çıqtı, gaz borusı zarar kördi. Etraftaki evler zarar kördi – camlar qırıldı, dep qoştı Harkiv şeer yolbaşçısı.
Harkiv vilâyetiniñ arbiy memuriyet yolbaşçısı Oleg Sinegubovnıñ malümatına köre, darbelerden biri Mala Danılivka qasabasına endirildi. «Çiftlik binasına ücüm etildi, yanğın çıqtı. Yaralanğanlar aqqında malümat yoq», – dep qoştı o.
Mala Danılivka cemiyetiniñ reisi Oleksandr Gololobovnıñ qayd etkenine köre, raketa darbesi neticesinde tarihiy bina yoq etildi – Harkiv zooveterinar institutınıñ maneji.
Keçken gece ava telükesi Kyiv ve Kyiv vilâyetinen beraber bütün Ukrayınada ilân etilgen edi.
Ukrayına Silâlı quvetleriniñ Ava küçleri bergen malümatqa köre, cumaaqşamına keçer gecesi Rusiye Ukrayınağa 11 qanatlı raketa ve 32 «Şahed» darbe uçucısızınen ücüm etti. Darbelerniñ nişanı kritik infrastruktura obyektleri oldı.
Ukrayına Silâlı quvetleri bildirgenine köre, yedi raketa ve 32 kamikadze dronı urıp tüşürildi – Hmelnıtsk, Dnipropetrovsk, Çerkask, Kırovogradsk, Zaporijjâ, Odesa, Herson, Kyiv ve Vınıtsâ vilâyetlerinde.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
