Rusiyeniñ Ukraina diplomatik temsilcilikleri hadimlerini tahliye etip başladı. Bu malümatnı TASS Rusiye devlet agentligine Rusiyeniñ Kyiv elçihanesi tasdıqladı.
«Hadimlerni endi tahliye eteler», – dedi menba.
Elçihane vekili Ukraina kütleviy haber vastalarınıñ Rusiyeniñ diplomatik temsilciliklerinde hadimler kâğıtlarnı yaqqanına dair malümatını tasdıqladı.
«Bu planlaştırılğan bir tedbir. Şimdiki kibi vaziyetlerde alınacaq tedbirler bar, hususan telükesizliknen bağlı», – dep qayd etti o.
Rusiyeni Ukrainada Kyivdeki temsilciligi ve Harkiv, Odesa ve Lvivdeki baş konsullıqları temsil ete.
Diplomatik missiyalarnıñ bütün hadimlerini Ukrainadan tahliye etmek qararı aqqında Rusiye Federatsiyasınıñ Tış işler nazirligi fevralniñ 22-nde bildirdi.
«Bu vaziyette birinci vazifemiz – Rusiye diplomatları ve elçihane ve baş konsullıqlarnıñ hadimlerini tüşünmektir. Olarnıñ ayatını ve telükesizligini qorumaq içün Rusiye reberligi Ukrainadaki Rusiye çetel müessiselerinden hadimlerni tahliye etmege qarar aldı, bu eñ yaqın vaqıtta olacaq», – dep aytıla haberde.
Tış işler nazirligi bildirgenine köre, bu qarar provokatsiyalar ola bilecegi içün qabul etildi, çünki diplomatlarğa «öldürüv telükeleri seslendirildi».
Ukraina buhranı sebebinden ABD ve Avropa memleketleriniñ çoqusı diplomatik missiyalarnıñ hadimlerini Lvivge avuştırıp, vatandaşlarını memleketni terk etmelerine çağırdı.
Rusiye fevralniñ 21-nde «DNR» ve «LNR» silâlı gruppirovkalarınıñ «mustaqilligini tanıdı» ve «cumhuriyetlernen» dostluq ve işbirligi vesiqalarını tasdıqladı. Vesiqalarğa köre, Rusiye, «DNR» ve «LNR» «tecavuz aktlarına» qarşı areket etecek ve bir-birine arbiy yardım kösterecek. Añlaşma beş yıl müddetine avtomatik uzatuv ile 10 yılğa tizile.
Federatsiyası Şurası ise prezident Vladimir Putinge Rusiye ordusını Donbasta qullanmağa izin berdi.
Ukraina Tış işler nazirligi bildirgenine köre, Rusiye tarafı «LNR» ve «DNR» gruppirovkalarını tanıp, halqara uquq esaslarını bozdı, qararnıñ ise iç bir uquqiy aqibeti olmaycaq. Ğarp memleketleri Rusiyege qarşı sanktsiyalarnı kirsetip başladı.
Ukraina ve Ğarp Rusiyeni Ukrainağa ücüm etmege azırlanğanında qabaatlay. Moskva böyle planları olğanını inkâr ete, lâkin Ukraina sıñırlarında tahminen 150 biñ arbiy buluna.
