İstanbul yaqınlarında avgustnıñ 30-nda Rusiye yük gemisi Türkiye yalısına oturdı. Türkiye kütleviy haber vastaları bildirgenine köre, gemi Novorossiysk limanında uçucısız ücümine oğradı. Darbeden soñ ekipaj yük gemisini qurtaruv qayıqlarınen terk etti, zarar körgen gemi ise Türkiye yalısına urulğanına qadar Qara deñizde anda-mında atıla edi.
108 metrlik "Omskiy-107" yük gemisi Taganrog limanına ait. Soñki vaqıtları Rusiye ve Türkiye cenübiy limanları arasında yük taşıy edi. Novorossiyskte ücümniñ tam künü aytılmay.
Gemi fotoresimini Haberler neşiri derc ete. Anda körüne ki, yük gemisi darbe ve ateşten pek zarar kördi. Kapitan köprüçigi bayağı zarar körgen ve yanğan.
Qarağa yaqınlaşqan "Omskiy-107" yük gemisini yalıdan plâjda raatlanğanlar kördi. Olar qurtaruv hızmetlerini çıqardı. Yalı qaravulı gruppaları gemige qıymet kesti. Tahqiqat başlatıldı.
Soñki vaqıtları Rusiye Qara deñiz limanları Ukrayina uçucısızlarınıñ ücümlerine muntazam sürette oğray, hususan Novorossiysk limanı zarar köre. Ukrayina Silâlı quvetleriniñ darbelerine em arbiy gemiler, em yük gemileri oğray. Avgustnıñ başında deñiz taşıyıcıları Novorossiysk seferlerine cenk telükeleri sebebinden fiyatlarnı arttırdı. Avgustnıñ 27-nde dünyanıñ eñ büyük konteyner taşıyıcısı Mediterranean Shipping Company (MSC) Novorossiysk limanı ile işini toqtattı. Sebebi uçucısıznıñ şirket gemilerinden birine qarşı ücümi oldı.