Dekabrniñ 19-na keçer gecesi Rusiye Federatsiyasınıñ Brânsk, Kursk, Millerova ve Oröl rayonlarından 85 Shahed ücüm dronı ve dronlarnıñ diger çeşitlerinen Ukrayinağa ücüm ettiler, dep haber ete Ukrayina Silâlı quvetleriniñ Ava küçleri. Bundan ğayrı, haberge köre, Rusiye ordusı işğal etilgen Qırımdan ve Rusiyeniñ Rostov vilâyetinden eki «İskander-M» ballistik raketasınen ve Kursk vilâyetiniñ ava meydanından «H-59/69» idare etilgen aviatsion raketasınen ücüm ettiler.
«Saat 08:30-ğa qadar Poltava, Sumı, Harkiv, Kyiv, Hmelnıtskıy, Çerniğiv, Çerkası, Kirovoğrad, Dnipropetrovsk ve Mıkolayıv vilâyetlerinde 45 Shahed ve diger uçucısızlarnıñ urıp tüşürilgeni tasdıqlandı. Mudafaa küçleriniñ faal areketi neticesine duşmannıñ 40 uçucısız-imitator coyuldı (menfiy aqibetleri olmadı)», – dep qayd etti Ukrayina Silâlı quvetleriniñ Ava küçleri.
Raketalarnıñ darbesi neticesinde Sumı ve Dnipropetrovsk vilâyetlerindeki mustaqil, çoq daireli evler ve münitsipal mülk zarar kördi, elâk olğan ve yaralanğanlar yoq.
«Uçucısıznıñ ücüm etkeni qayd etilmedi, zarar ya da qurbanlar aqqında malümat yoq», – dep bildirdi Ukrayina Silâlı quvetleriniñ Ava küçleri.
Rusiye arbiyleri muntazam sürette çeşit silâ çeşitleri ile ukrayin regionlarına ücüm ete.
Rusiye yolbaşçılığı, Rusiye ordusınıñ, büyük cenk vaqtında, Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminlevi obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
