Odesada gece dron ücümi neticesinde doquz qatlı binanıñ 18 dairesi yoq etildi, eki insan elâk oldı, sekiz kişi yaralandı, aralarında bir bala bar, dep aytıla Ukrayına fevqulâde vaziyetler devlet hızmetiniñ haberinde.
«Adise yerinde ilk qazaiy-qurtaruv işleri toqtamayıp keçirile, devlet fevqulâde vaziyetler hızmetinden 92 kişi ve 21 tehnika, göñülli teşkilâttan kinologlar celp etildi», – dep bildire müessise.
Qurtarıcılar eki insannıñ cesedi çıqarıldı, dep ayta.
«İlk malümatqa köre sekiz insan yaralandı, biri bala, dört sakinni qurtarıp oldılar. Yanğıncılar 50 metr kârede yanğınnı söndürdi», – dep qayd ete Devlet fevqulâde vaziyetler hızmeti.
Bundan ğayrı, patlav yanındaki böyler binasına da zarar ketirdi, 11 çoq qatlı mesken ev qızdıruvsız qaldı. Sakinler içün vaqtınca yerleşüv noqtaları belgilendi.
Qızdıruv ve maneviy yardım noqtaları açıldı. 100-den çoq insan Devlet fevqulâde vaziyetler hızmetiniñ psihologlarından yardım ala.
Göñülli teşkilâtlar Qızıl Haç vekillerini celp etip aşnen temin ete.
Odesa vilâyetiniñ arbiy memuriyeti yıqılğan bina tübünden sağ bir adam qurtarıldı, dep bildirdi. Odesa vilâyetiniñ arbiy memuriyeti malümatına köre, Rusiye dronı ücüm etkende erkek mağazda edi.
Gece Ukrayına Ava quvetleri Odesa ve Mıkolayıv vilâyetlerine qarşı Rusiye uçucısızlarınıñ ücümi aqqında bildirdi.
Rusiye arbiyleri çeşit silâlardan – dron, raketalar, RSZO - Ukrayına regionlarına muntazam surette ücüm ete. Yanvar ayında Rusiye ücümlerini quvetleştirdi, neticede onlarnen insan elâk oldı, yüzlernen insan yaralandı.
Moskva, isbat ve şaatlıqlarğa baqmadan, tam cenk başlağanından berli Ukrayınada vatandaşlarğa ateş açılğanını red ete.
Fevralniñ 24-nde Ava quvetleri komandanı Mıkola Oleşçuk büyük cenkniñ eki yılı devamında Ukrayına arbiyleri 1905 Rusiye raketasını, hususan 25 «Kinjal», 4844 darbe dronı ve 7660 operativ-taktiv seviyeli uçucısıznı yoq etti, dep bildirdi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
