«Gece çeşit silâ qullanılğan ücüm oldı. Duşman Odesağa qarşı «İskander-M» ve «Oniks» qullandı, o, şeerniñ merkezine ücüm etti. Duşman UNESCO mirası olğan şeerniñ tarihiy qısmına yaqın liman infrastrukturasına zarar ketirmege istedi. Şunıñ içün raketa limanğa degil, şeer kvartallarından birine yaqın tüşti – müzey, mesken evler zarar kördi, yerli ealiden yaralanğanlar bar», – dep tarif etti o, milliy telemarafon yayınında.
Onıñ aytqanına köre, bir buçuq saat devamında Rusiye ordusı bir qaç gruppa «şahednen» ücüm etti.
«Liman infrastrukturası zarar kördi – anbarlar, mahsus avtoyüklev tehnikası, zahire arabaları. 15 dronnı ava mudafaa sistemasınıñ quvetleri urıp tüşürdi», – dep tarif etti Cenüp mudafaa quvetleriniñ birleşken matbuat merkeziniñ reberi.
Ğumenük qayd etkenine köre, Oniks raketasını yoq etmek «pek qıyın», İskander-M ballistik raketası ava telükesi signalınen beraber keldi.
«İskander-M» qapatılğan binağa ücüm etti. Çoq şükür, kimse zarar körmedi», – dep qoştı o.
Ğumenük qayd etkenine köre, Rusiye ordusı Ukrayına cenübine eñ az 20 dron ve 4 raketanen ücüm etti.
Rusiye ordusı gece cenübiy regionlarğa çeşit raketa ve darbe dronlarınen ücüm etti. Ukrayına Silâlı quvetleri Cenüp mudafaa quvetleri bildirgenine köre, Herson vilâyetine Rusiye raketaları ve KABlar ücüm etti, Mıkolayıv vilâyetinde ava mudafaası çalıştı, Odesa vilâyeti raketa-dron ücümine oğradı.
Nişanlarnıñ çoqusı yoq etildi, amma 5 kişi yaralandı.
Rusiye arbiyleri Ukrayına mesken yerlerine çeşit silânen ücüm ete – uçucısız, raketa, toplu ateş reaktiv sistemalarınen. Rusiye delil ve şaatlıqlarğa baqmadan, Ukrayınada vatandaşlarğa qarşı darbe endirgenini inkâr etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
