Yanvarniñ 17-ne keçken gecesi Rusiye ordusı Odesağa dronlar ile ücüm etti, üç insan yaralandı, grajdanlıq mesken infraterkibi zarar kördi, dep bildirdi Odesa vilâyeti arbiy memuriyetiniñ reisi Oleg Kiper.
Onıñ aytqanına köre, 62 yaşında erkek ve 1955 ve 1995 senesi doğğan qadınlar yaralandı. Kiper, olarnıñ alı aqqında aytmadı, amma ekimler olarğa kerekli yardım köstergenini qayd etti.
O şunı da bildirdi ki, zarar körgen evden 130 insan tahliye etildi.
Ukrayina cenübiniñ mudafaa quvetleri, RF orduları cenübiy regionlarğa "Shahed-131/136" tipindeki dronlarnen ücüm etti, dep bildire.
''Ava mudafaası bölükleri aman-aman üç saat devamında çalıştı. Mıkolayiv ve Kirovoğrad vilâyetlerinde birer dron yoq etildi. Düşmannıñ esas ğayretleri Odesağa ücüm etmek içün sarf etildi. Kamikadze dronları Qara deñizden kritik yükseklikte keldi'', - dep aytıla haberde.
Arbiylerniñ malümatına köre, Odesa vilâyetinde 11 dron yalığa yaqınlaşqanda urıp tüşürildi, çoqusı deñizge tüşti.
''Amma bir qaç urulğan uçaqnıñ parçaları ve patlav dalğası Odesanıñ Primorskiy rayonında çoq qatlı ev, tükân, şahsiy maşinalarğa zarar ketirdi. Bir qaç yerde yanğın çıqtı: şeer sakinleriniñ evleri ve maşinaları yandı. Yanğıncılar yanğınnı tez söndürdiler", - denile beyanatta.
Rusiye arbiyleri Ukrayina topraqlarını muntazam sürette ateşke tuta. Vatandaşlarğa qarşı ateş açılğanına dair deliller olsa da, Moskva bu darbelerniñ maqsadı Ukrayinanıñ arbiy infrastruktursdı olğanını iddia ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
