Rusiye ordusı sentâbrniñ 30-na keçken gecesi Kıyivge ücüm etmek içün dronlarnı qullandı, ukrayin ava mudafaası quvetleri bütün dronlarnı yoq etti, dep bildirdi şeerniñ arbiy memuriyetiniñ yolbaşçısı Sergey Popko.
"Kıyivge dronlar gece, dalğalarnen ve farqlı yönelişlerden kele edi. Paytahtta ava telükesi 5 saattan ziyade devam etti. Ava mudafaasınıñ küçü ve vastaları ile Kıyivge telükeli olğan bütün rusiyeli dronlar zararsızlaştırıldı", — dep yazdı o.
Memurnıñ malümatına köre, şeerde zarar körgenler yoq.
Kıyivde ava telükesi gece saat 1:00 ilân etildi, yerli akimiyet Obolon rayonında ava mudafaasınıñ işi aqqında haber etti.
RF reberligi, Rusiye ordusınıñ büyük cenk vaqtında Ukrayina şeerleri ve köyleriniñ grajdan infrastrukturalarına maqsatlı darbeler endirgenini, vatandaş ealisini öldürgenini ve hastahaneler, mektepler, bala bağçaları, energetika ve suv teminatı obyektlerini yoq etkenini red ete.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tanıdı ve olarnıñ maqsatlı olğanını qayd ete.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
