Rusiye BM Halqara mahkemesiniñ ilhaq etilgen Qırımda Qırımtatar Milliy Meclis faaliyetiniñ yasağını lâğu etüv ve ukrain tilinde tasilni ğayrıdan tiklev emrini yerine ketirmey. Bu aqta Ukraina Tış işler naziriniñ Avropa integratsiyası meseleleri muavini Olena Zerkal Gaagadaki BM Halqara mahkemesinde çıqışta bulunıp ayttı.
«Rusiye BM Halqara mahkemesine vaqtınca alınğan tedbir emriniñ riayet etilmesinen bağlı yañlış malümat bere. Rusiyeniñ mahkemeniñ emrine köstergen sayğısızlıq sebebinden Ukrainanıñ açuvını bildirmek isteyim. Vaziyet eki yıl evelsi keç qaldırılmaycaq edi, şimdi daa acele oldı. Meclis yasağı qala, Qırımda ukrain tilinde tasil ise yoq oldı», – dep bildirdi Zerkal.
Onıñ qayd etkenine köre, Qırımdaki vaziyet daa beter ola, ve qırımtatar faalleri, hususan Lutfiye Zudiyeva ve Mümine Saliyevanıñ tutulması ve Rusiye tarafınıñ toplaşuvda «alternativ kerçeklik kösterip, yañlış malümatnı berüvi» ırqiy ayırım ola.
Olena Zerkal Ukraina tarafı BM Halqara mahkemesiniñ «Ukraina Rusiyege qarşı davası» toplaşuvı içün qarşı deliller azırladı, dep bildirdi.
İyünniñ 3-nden 7-ne qadar Gaagada BM Halqara mahkemesinde Terrorizmni maliye etüv ile küreş ve bütün ırqiy ayırım şekillerini yasaqlavğa dair «Ukraina Rusiyege qarşı» davasınıñ ağzaviy diñlevleri olacaq. Diñlevler devamında Rusiye bu organ «Ukraina Rusiyege qarşı» mahkeme davasını baqamaz, dep israr etecek ola. Qırımtatar Milliy Meclisiniñ reisi Refat Çubarov mahkeme diñlevlerine Gaagağa keldi.
2017 senesi Ukraina BM Halqara mahkemesinde Rusiyege qarşı dava açtırıp, onı Ukrainada terrorizmnm maliye etip qoltutqanı içün, em de Ukrainağa qarşı istilâ çerçivesinde ayırım yapqanı içün mesülietke çekilmesini talap etken edi. Vaziyetni köz ögüne alğan mahkeme 2017 senesi aprelniñ 19-nda Ukrainanıñ talabınen Rusiyege qarşı vaqtınca tedbir almağa qarar qabul etti.
Vesiqada Rusiyeden Qırımda Qırımtatar Milliy Meclisiniñ yasağını lâğu etmesi ve yarımadada ukrain ve qırımtatar tillerinde tasil aluvnı temin etmesi talap etile.
