Rusiye FİN-i qırımtatar cemaat jurnalisti Remzi Bekirovnı Hakasiya Cumhuriyetiniñ 33-nci tüzetüv cezahanesiniñ apishanesinden evge yaqın olğan cezahanege avuştırmaqnı red etti. Bu aqta "Qırım birdemligi" onıñ qadını Halidege atıf etip bildire.
Qayd etilgenine köre, Cezalarnı yerine ketirüv ve mahsus esaplav idaresiniñ bildirgenine köre, Bekirovnı avuştırmaq ve jurnalistniñ 33-nci tüzetüv cezahanesine ceza çekmesine keder etken vaziyetler yoq.
FSİNde bildirdiler ki, "terrorizm" maddesine istinaden mahküm etilgenler, müessiseniñ tayin etken yerlerindeki tüzetüv müessiselerine yollanıla.
Halide Bekirovanıñ qayd etkenine köre, bu, aqayını Qırımğa yaqın olğan koloniyağa avuştırmaq içün beşinci arizası oldı.
"Er sefer çeşit sebepler tapıp red eteler. Şimdi ise evge yaqınlaştırmaycaqları kesen qarardır. Ve 5,3 biñ kilometr bizim içün pek uzaq. Balalarnen ketmek pek qıyın olacaq", — dep tarif etti qırımlınıñ apayı.
2019 senesi mart ayında Rusiye uquq qoruyıcıları Qırımda qırımtatar faalleriniñ, hususan «Qırım birdemligi» cemaat birleşmesi vekilleriniñ evlerini tintti. Umumen 24 insan tutuldı, aralarında vatandaş jurnalistleri Osman Arifmemetov, Rustem Şeyhaliyev, Remzi Bekirov. 2019 senesi martnıñ 27-nde ve 28-nde Aqmescitteki Rusiye mahkemesi tutulğanlarnı apiske aldı.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
