Qırım yalısında Rusiye FSB hadimleri tarafından zapt etilgen Ukraina deñiz askerleriniñ advokatları Avropa insan aqları mahkemesine muracaat etecek. Bu aqta qırımlı advokat Edem Semedlâyev Qırım.Aqiqat Radiosınıñ yayınında bildirdi.
Onıñ qayd etkenine köre, ukrain deñizcileri mahkeme esnasınıñ er basamağında özüni cenk esiri dep sayğanlarını bildirdi.
«İtiraz arizası red etilgen soñ Avropa insan aqları mahkemesine muracaat etmek mümkün, temyizden keçmege şart degil. Advokatlar temyiz etecekmi-yoqmı qarar almadı, çünki netice 99%-ğa belli. Em de yanvarniñ 24-ne qadar daa bir kere uzatılacaq, şu sebepten daa tüşünemiz. Nasıl olsa da, Avropa insan aqları mahkemesine ariza berecekmiz», – dedi Semedlâyev.
Tünevin rusiyeli advokat Nikolay Polozov, FSB tarafından esir alınğan 24 ukrain askeri tahqiqatqa cenk esiri olğanını qayd etti, dep bildirdi.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
