Link açıqlığı

Saatnıñ esas haberi

Rusiye FSBsi, sabıq dissident Oleg Sofânikni Qırımdan yibermedi


Oleg Sofânik
Oleg Sofânik

Rusiye FSBsiniñ sıñır idaresi aqyarlı yaldayıcı marafoncı, sabıq dissident Oleg Sofânikniñ Qırımnı terk etip esas Ukrainağa ketmesine izin bermedi. Bu aqta o, Qırım.Aqiqat mühbirine bildirdi.

«Bugün «Çonğarda» FSB meni esas Ukrainağa yibermedi. Ukraina vatandaşı pasportım bar, amma zornen berilgen Rusiye vatandaşlığı olarğa insanlarnı «Putin alanından» çıqarmağa bermey. Böyle añlattılar. Sıñırdan keçmege bile bermediler. Laf etmeyler bile. «Putin ausvaysıñ» olsa – qul vesiqası bu – çıqamazsıñ, Rusiyeniñ büyük apishane divarları arasında qaldıñ. İşğalci akimiyet zorlap bergen Rusiye pasportınıñ lâğu etilmesini talap etecem», – dedi Sofânik.

Onıñ aytqanına köre, çıquv yasağına dair bir vesiqa berilmedi.

Rusiye FSBsi Sofânikniñ Qırımdan çıquv yasağını açıq sürette izaatlamay.

2019 senesi noyabrniñ 14-nde Rusiye quvetçileri Oleg Sofânikni Qırım ve Herson vilâyetiniñ memuriy sıñırında tuttı. Bundan evel o, Lukull limanından (Qırımnıñ ğarbinde) Aqyardaki Ömega körfezine yaldadı. 30 km mesafeni 10 saat içinde yaldadı – raatlanmayıp ve bir özü olıp. Bunı Sofânik qırımtatar sürgünliginiñ 75 yılına bağışladı.

Oleg Sofânik – meşur aqyarlı yaldayıcı marafoncı, Ukraina rekordları kitabınıñ rekordçısıdır. 2012 senesi mayıs ayına qadar Sofânik 50 marafonda yaldadı, eñ uzunı 350 km Cenübiy-Qıtay deñizinden edi.

Sofânik Aq deñiz, Marmara deñizi, İstanbul boğazını, Çanaqqale boğazını yaldap keçti. Qırım yalısında 100 kilometrge qadar marafonlarda iştirak etti. Qışta suvuq suvda da yaldağanınen bellidir.

Aqyarlı dissident ola. Askerlikten ve Sovetler Birliginiñ vatandaşlığından vazgeçkeni içün onı psihiatrik tedaviylevge mecbur etken ediler.

XS
SM
MD
LG