Rusiye FSBsi Qırımda «qırımtatar batalyonına» kirgen Ukraina vatandaşını tuttı, dep bildirdi. Bu aqta martnıñ 5-nde TASS Rusiye devlet agentligi haber ete.
FSB malümatına köre, er adamı 2015 senesi «qırımtatar batalyonınıñ» erkânına kirdi. O sene noyabr ayında o, «yarımadanıñ iqtisadiy ve energetik blokadasında» iştirak etti.
TASS, er adamı tutulğan videonı Telegram kanalında derc etti. Onıñ adı ve soyadı aydınlatılmay, qabaatlanğannıñ izaatları yoq.
Erkek tutulğanını bildirgen mustaqil menbalar yoq. Rusiye Federatsiyasınıñ FSB saytı açılmay.
2021 senesi iyün ayında Kreml kontrolindeki Aqmescitniñ Kiyev rayon mahkemesi «qırımtatar batalyonında» iştirak etkeninde qabaatlanğan eki erkekniñ ükmüni çıqardı.
2021 senesi martnıñ 23-nde Rusiye kontrolindeki Qırımnıñ Kirov rayon mahkemesi Mecit Ablâmitovnı «qırımtatar batalyonında» iştirak etkeninde qabaatlap, azatlığını 1 yılğa sıñırlamaqnen 6 yıl sert rejimli koloniyada qalmmasına üküm etti.
