Rusiye Federal havfsızlıq hızmeti zapt etilgen «Nikopol» ve «Berdânsk» ukrain katerleriniñ topçı tertibatlarınıñ işini teşkerecek ola. Bu aqta advokat Nikolay Polozov bildire.
«FSB tahqiqatı cenk esiri ukrain deñizcileriniñ davasında yañı ekspertiza keçirilmesini belgiledi. Tahqiqat «Nikopol» ve «Berdânsk» katerlerindeki topçı tertibatlarınıñ işini teşkerecek ola», – dep aytıla Polozovnıñ Facebook haberinde.
Onıñ qayd etkenine köre, martnıñ 28-29-nda cenk esiri ukrainalı deñizcilerge nisbeten tahqiqat areketleri devam etti.
Polozovnıñ aytqanına köre, bu eki kün içinde tahqiqatçılar advokatlarnı ve cenk esiri deñizcileri Volodımır Tereşçenko, Sergiy Tsıbizov ve Andriy Oprısko içün tanışuv yaptı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
