Rusiye FSBsi hadimleri Eski Qırım sakini, qırımtatarı İsmet Memetovnıñ evini tintip bitirdi. Tintüv noyabrniñ 21-nde kün devamında keçirildi. Memetov «Meclis faaliyetinen alâqaları bar olğanında» şeklene, dep haber ete «Qırım birdemligi».
«Tahqiqat tedbirleri yekünlendi. Protokol tizildi. Advokatlarnıñ izaatlarını bekleymiz. Emil Kürbedinov, Rustem Kâmilev, İsmet Memetov ve uquq qoruyıcı organlarnıñ hadimleri evden çıqtı. Protokolnı toldurmaq içün başqa binağa keçti. Er yer baqıldı», – dep aytıla haberde.
Haber etile ki, advokat mahkeme qararı olmağanı içün evniñ baqılmasına qarşı çıqtı. Buña baqmadan, Rusiye uquq qoruyıcı organlarınıñ hadimleri İsmet Memetovğa ait binalarnı baqıp çıqtı: eki tehnik baquv stantsiyası, tükân, qave, soñra da ev.
Qırım.Aqiqat Memetov ve advokatlarınıñ izaatlarını almağa tırışa.
Şaatlarnıñ qayd etkenine köre, Rusiye FSBsi hadimleri keçirgen tintüv vaqtında evde 2-5 yaşlarında balalar bar edi. İsmet Memetovnıñ altı balası bar, dep qayd etti «Qırım birdemligi».
Qırımtatar faaline qoltutmaq içün bir çoq insan keldi. İsmet Memetovnıñ imayesine advokat Emil Kürbedinov ve uquqçı-aq qorçalayıcı Rustem Kâmilev keldiler.
Qırımtatar Milliy Meclisiniñ reisi Refat Çubarov Qırım.Aqiqatqa izaat berip, İsmet Memetov ürmet qazanğan bir insan olğanını ayttı. Çubarov, «Meclis faaliyetinen alâqaları bar» kibi şübeler «tintüv keçirmek içün manaçıq» olğanını tüşüne.
Noyabrniñ 21-nde Rusiye FSBsi hadimleri Eski Qırım sakini, qırımtatar faali İsmet Memetovnıñ evinde tintüv keçire, dep bildire «Qırım birdemligi».
Memetov Rusiyede ve onıñ işğali altındaki Qırımda yasaqlanğan Qırımtatar Milliy Meclisiniñ faaliyetinen alâqaları bar olğanında şeklene. FSB malümatına köre, Memetov Meclisni maliye ete ve «ekstremist edebiyatnı saqlay».
İsmet Memetov oña aydınlatılğan qabaatlarnen razı degil ve yapılğan basqınıñ siyasiy mabüslerniñ mahkemelerine faal qatnağanınen bağlı olğanını tüşüne.
Rusiye uquq qoruyıcıları Eski Qırımdaki tintüvlerni izaatlamay.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
