Qırımdaki Rusiye sıñırcıları memuriy sıñırdan yañlış yerde keçip, esas Ukrainağa ketecek olğan erkekni tutıp aldı. Bu aqta aprelniñ 25-nde Qırımdaki Rusiye FSBsiniñ Sıñır idaresiniñ matbuat hızmeti bildire.
Rusiye FSBsi «erkek gece çapıp keçmege tırıştı», dep bildire.
«Erkek muqayt olıp, etrafını baqmaq içün topraqqa yatsa da, telüke gruppası onı tutıp aldı», – dep aytıla mahsus hızmetniñ haberinde.
FSBniñ matbuat hızmeti erkek sıñırnı qoruv kompleksleri yardımınen tapıldı ve tutuldı, dep qayd ete.
Sıñırcılar kompleksniñ monitorlarından erkekniñ areketlerini ve yolunı taqip etti.
Rusiye mahsus hızmetleri tutulğan kişiniñ adını aydınlatmay. O, 1980 senesi doğma Ukraina vatandaşı ola, dep haber etile.
«Erkek Qırımğa «yahşçı ayat» içün kelgenini añlattı, amma kimlik vesiqalarını coyğan soñ evge keçiş noqtasından tış qaytmağa tırıştı. Sıñır idaresiniñ hadimleri Ukraina vatandaşına nisbeten teşkerüv keçirgen soñ Rusiye Ceza kodeksiniñ 30-ıncı maddesiniñ 3-ünci qısmı, 322-nci maddesiniñ 1-inci qısmına istinaden – Rusiye devlet sıñırından qanunsız keçmek ıntıluvı – cinaiy dava açtı», – dep aytıla haberde.
Ukraina Devlet sıñır hızmeti Qırımnıñ memuriy sıñırında FSB tarafından tutulğan Ukraina vatandaşlarınıñ kimligini bilmege imkân yoq, dep bir çoq kere bildirgen edi. Rusiye tarafı olarnıñ şahsiy malümatlarını aydınlatmay. Ukraina sıñırcıları «işğalcilernen bağ tutmağanını» qayd ete.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
