Rusiye Federal havfsızlıq hızmeti işğal etilgen Qırımda yaşağan balalarğa «Ukrainanıñ parlaq balaları – bala icadınıñ yarışı» Şarqiy regional yarışında iştirak etmege yasaq etti.
Bu aqta Ukraina prezidentiniñ Yuqarı Rada vekili, Ukraina halq deputatı İrına Lutsenko bildirdi.
«Ukrain medeniyeti inkişaf etkeniniñ parlaq örnegi Ukrainada «Ukrainanıñ parlaq balaları» bala yarışınıñ keçirilüvi ola. Kramatorskta Lugansk, Donetsk ve Qırım balaları içün yarış keçirgen edik. Qırımlı balalarğa ve olarnıñ ana-babalarına Rusiye Federatsiyasınıñ FSBsi yarışqa barmağa yasaq etti. On altı baladan tek dördü keldi – Ukrainanıñ işğal etilmegen topraqlarında yaşağanlar», – dep bildire Lutsenkonıñ aytqanlarını Petro Poroşenko Blokunıñ matbuat hızmeti.
Onıñ qayd etkenine köre, yarışta balalar ukraince çıqışta bulundı – «devlet tiliniñ ğalebe triumfıdır».
Rusiye FSBsi mezkür malümatnen bağlı bir izaat bermedi.
Martnıñ 14-nde haber etilgeni kibi, Kramatorskta «Ukrainanıñ parlaq balaları – bala icadınıñ yarışı» Şarqiy regional yarışınıñ bayram kontserti olıp keçti. Mında yarış finalında Qırım temsilcisi Qırımnıñ Canköy rayonından 11 yaşında Emiliya Kurtseitova belgilendi. Final martnıñ 29-nda Kyivdeki Ukraina Sarayında olacaq.
Bundan ğayrı, jüri diger qırımlı iştirakçilerni de qayd etti: 1-inci yer, Ukraina halq deputatı Maksim Yefimovdan ve teşkiliy komitetten mahsus bahşış alğan 15 yaşında Asiye Abhairova (Jamalanıñ «1944» yırını icra etti); 2-nci yer ve seyircilerniñ sevgisini qazanğan Alim Osmanov, 14 yaşında («Ne tvoya viyna»); 3-ünci yer ve Ukraina prezidentiniñ Yuqarı Rada vekili İrına Lutsenkodan mahsus bahşış – 12 yaşında Server Karabayev («Barhattsı»).
