Rusiye FSBsiniñ sıñır hızmeti ilhaq etilgen Qırımda diversiya ve yarımadanı ziyaret etken Rusiye gemilerine qarşı provokatsiyalar telükesi qala, dep bildire. Rusiye FSBsi Sıñır hızmetiniñ reberi Vladimir Kulişovnıñ «Rusiye gazetasına» bildirgenine köre, diversiyalar telükesi «Ukraina mahsus hızmetleri ve ekstremistler tarafından» ola bile.
Onıñ qayd etkenine köre, FSB Sıñır hızmeti Qırım ve esas Ukrainanıñ memuriy sıñırındaki «vaziyetni közete». Müessise yolbaşçısı «vaziyet belli bir derecede stabilleşti», dep qayd etti.
Kulişovnıñ bildirgenine köre, «keçken sene noyabr ayında Keriç rayonında olğan provokatsiyağa oşağan soylarınıñ telükesi bar», dep israr ete. O vaqıt FSB silâ qullanıp, ukrain gemileri ve deñizcilerni zapt etken edi.
Ukraina uquq qoruyıcıları Rusiye tarafınıñ bu beyanatlarını izaatlamay.
Halqara deñiz uquqı mahkemesi mayısnıñ 25-nde Gamburgda Rusiye zapt etken ukrainalı deñizcilerniñ davası baqılğan toplaşuvda Rusiyeni arbiy gemilerni acele azat etip, Ukraina kontroline qaytarmasına qarar berdi.
2018 senesi noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
