Rusiye FSBsi hadimleri, Herson vilâyeti ve Qırım arasındaki memuriy sıñırda eki Aqyar sakinini tutqanlarını bildirdi. FSB-niñ Qırım ve Aqyar boyunca idaresiniñ matbuat hızmeti haber etkeni kibi, adamlarnı "Armânsk" ve "Canköy" kiriş-çıqış noqtalarında tuttılar.
Müessise malümatına köre, aqyarlılarnı, Qırımğa afyon ilâclarnınıñ bir çeşiti - "subuteks" ilâcınıñ ketirmesi içün toqtattılar. Bundan ğayrı, rusiye quvetçileri, olardan birisiniñ evini tintti.
"Oprerativ tedbirler devamında "buprenofin" narkotik maddesiniñ umumen 500 dozası tutılıp alındı", - haber ettiler FSBde.
"Narkotik maddelerniñ kontrabandası içün" yaqalanğan adamlarğa qarşı cinaiy dava açıldı. Olarnıñ adları belli degil.
Oktâbr 29-ında ilhaq etilgen Qırımda Rusiye FSB-siniñ sıñırcıları, Ukraina vatandaşından arbiy yedeklerni tutıp alğanlarını ve olarnı yarımadağa keçirmege bermegenlerini bildirdi.
