Rusiye FSBsi Ukrayına mahsus hızmetlerinen işbirligi yapqanında ve Qırımnıñ arbiy obyektlerinde diversion-terroristik ücüm azırlağanında qabaatlağan eki qırımlını tuttı. Bu aqta TASS yaza.
«1980 ve 1983 seneleri doğğan Yalta sakinleri Ukrayına telükesizlik hızmetiniñ vekilinen işbirligi yaptı, yarımadada içtimaiy-siyasiy, iqtisadiy ve arbiy vaziyet aqqında malümat berdi», – dep aytıla haberde.
Qayd etilgenine köre, mabüsler Ukrayına mahsus hızmetleriniñ menfaatlarında Rusiye Federatsiyasınıñ Silâlı quvetleriniñ obyektlerinde foto ve video hızmetlerini teklif etti, Qırımnıñ arbiy obyektlerinde diversion-terroristik ücümlerni yapmağa azırlandı.
Erkekler balıq tutqanda tutuldı, dep aytıla haberde. Qırımlılarğa qarşı Rusiye Ceza kodeksiniñ 275.1 maddesine istinaden cinaiy dava açıldı – olar 8 yılğa qadar azatlıqtan marum etile bile.
Qırımtatar resurs merkezi Qırımda siyasiy sebepli tutuvlarnıñ sayısı arttı, dep haber etti. Yarımada sakinlerini Rusiyede yasaqlanğan «Hizb ut-Tahrir», «İyegova şaatları» teşkilâtlarına alâqası olğanından şübhe, Rusiye ordusında askerlik yapmağa istemegenlerinden, «içtimaiy ağlarda terrorizmni aqlağanlarından», «terrorizmge yardım etkeninden», «devlet hainliginden» tutuldı.
Rusiyede büyük istilâ başlağanından «Ukrayına diversantları» tutuldı, dep haber etile. Kyiv bu qabaatlavlarnı tanımay.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
