Link açıqlığı

Saatnıñ esas haberi

Rusiye FSB-si zapt etilgen UHH hadimini daa bir kere sorğuğa çekti - advokat


Andrey Draç
Andrey Draç

Rusiye FSB-siniñ tahqiqatı bir kün evel Qırım yalısı yanında zapt etilgen Ukraina Havfsızlıq Hızmetiniñ hadimi Andrey Draçnı qoşma sorğuğa çekti.

Bu aqta öz Facebook saifesinde onıñ advokatı Andrey Pepa bildirdi.

Onıñ aytqanına köre, evel özüni cenk esiri sayğanını aytqan Andrey, Jeneva şartnamesiniñ 17-nci maddesine köre, yalıñız şahsı aqqında malümatnı açıqladı - adı, doğğan yılı, unvanı. Qalğan suallerge cevap bermekni ise red etti.

“Andrey cesürliknen dayana, şikâyetleri yoq. Qoranta ve dostlarına büyük selâmlar ete. Yardım ve qoltutuv içün er keske minnetdarlığını bildire”, - dep yazdı Pepa.

Daa evel Rusiye advokatı Nikolay Polozov, Rusiye FSB-si zapt etilgen arbiyler Mıhaylo Vlasük ve Yüriy Bezyazıçnıynı sorğuğa çekilgenlerini bildirdi.

Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.

Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».

Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.

Qırım Muhtar Cumhuriyetiniñ prokuraturası Rusiye FSBsi tarafından zapt etilgen ukrain deñiz askerlerini cenk esiri dep tanıdı.

Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.

XS
SM
MD
LG