Rusiye FSB-si, Qırımda sahte alkogol içimliklerni istisal etken cinayet gruppasınıñ faaliyetini kestirgenlerini iddia ete. Bunı, Rusiye FSB-siniñ Qırım udaresine atıf etip, "Krıminform" saytı bildire.
Müessisege köre, Aluştada Rusiye quvetçileri, istisal ve satuv yerlerinde operativ qıdıruv tedbirlerini keçirdi.
"Qanunsız tsehniñ anbarları ve satuv yerlerinde 2,9 tonna spirt ve alkogol içimliklerni tapıp, tutıp aldılar, o sahte içimliklerni, Rusiye brendleriniñ adlarını yapıştırıp satacaq ediler. Bundan ğayrı, alkogol yapması içün qullanılğan donatma ve ingrediyentleri de tutıp aldılar", - denile beyanatta.
FSB, Rusiye Cinaiy Kodeksiniñ 1711 maddesiniñ 6 qısmına köre cinaiy dava açılacağını bildire. Bu maddege köre eñ büyük ceza - 6 yıllıq apis müddeti.
