Qırımda Rusiye Federal Telükesizlik hızmeti yerli sakinni "Noman Çelebicihan adına qırımtatar batalyonında" iştirak etüv qabaatı ile yaqalad. Bunı Rusiye ve Qırım haber vastaları Qırım boyunca Rusiye FSB-sı idaresine atıfı etip haber eteler.
"Qırım sakini 2016 senesi öz isteginen Ukrayina territoriyasında faaliyet köstergen "Noman Çelebicihan adına qırımtatar batalyonı"na qoşuldı", "RİA Novosti Krım" bildirmeden alıntı ketire.
Yaqalav yeri, şübeli şahısnıñ adı ve soyadı belli degil. Onıñ açıq izaatları da şimdilik yoq.
Al-azırda Qırım sakinine qarşı Rusiye Ceza Qanunnamesiniñ 208 maddesiniñ 2-nci qısmına binaen (RF federal qanunı ile közde tutulmağa silâlı teşkilâtnıñ faaliyetinde iştirak etüv) cinayet davası açılğan.
Bugünde-bugün Qırımda "Noman Çelebicihan adına qırımtatar batalyonı"nda iştirak etüv qabaatı ile onlarca taqip etilüv faktları qayd etilgen.
Evel, Rusiyeniñ Yuqarı mahkemesi "terrorcı" ilân etip, "Noman Çelebicihan adına qırımtatar göñülli batalyonını" Rusiye Fedartsiyası terrortiyasında yasaq etti.
Ukrayina qanun qoruyıcı organlarınıñ terkibinde "qırımtatar batalyonı"nıñ yaratılması aqqında muzakereler 2016 senesinden berli ketmekte.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
