Rusiye Federal telükesizlik hızmeti şeerniñ Rusiye memuriyetiniñ binasını Ukrayina bayrağınıñ renklerine boyaması ve ateşke berme ıntıluvında qbaatlanğan 27 yaşlı Kezlev sakinine qarşı cinayet davasını açtı. Rusiye akimiyetine yaqın "Krıminform" saytınıñ malümatına köre, erkek terror aktına suiqast ile şübeli sayılır.
"1994 senesi doğma Kezlev sakini cinayet niyeti ile Qırım Cumhuriyetiniñ Kezlev akimiyet organlarından biriniñ memuriyet binasını yaqacaq oldı. Tecavuz obyekti kibi o, Kezlev memuriyetiniñ binasını sayladı, çünki o, vatandaşnıñ yaşağan yerine yaqın yerde yerleşe, oña gizli yaqınlaşma ve çıqış yolları, qayd etüv kameralarnıñ yerleşken yerleri oña bellidir", - dep bildirdiler Qırım boyunca FSB idaresinde.
Rusiye quvetçileri, mayısnıñ 16-nda saba saat 4-lerde erkek memuriyet binasına boya ile sepip, onı yaqmağa tıtırşqanı aqqında haber ettiler.
Cinayet davası RF Ceza qanunnamesiniñ 30-ncı maddesiniñ 3-nci qısmına ve 205-nci maddesiniñ 1-nci qısmına binaen açıldı. Maddege köre qabaatlanğan kişi 15 yılğa apis etile bilir.
Kezlevniñ Rusiye memuriyet binasınıñ fasadında sarı-mavı renk mayısnıñ 16-nda peyda oldı.
Mayısnıñ 16-nda Rusiye yolbaşçısınıñ vazifesini vaqtınca icra etken Aleksandr Loskutov "esaslı şübeli"niñ tevqif etilmesi aqqında haber etti. Bunıñ içün, onıñ sözlerine köre, Rusiye FSB, İİN ve şeerniñ Rusiye prokuraturasınıñ vekilleri celp etilgen. Rusiye nezaretinde olğan "Krım 24" telekanalı özüni Bogdan Ziza adlandırğan şahısnıñ qabaatını itiraf etip peşman olğanını bildirgen videonı yayınladı.
Ukrayinağa qarşı Rusiye silâlı ücümi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Aprelniñ başında Moskva Ukrayina şimalinde faal olğanını toqtattı, dep bildirdi. Tezden Ukrayina akimiyeti Kıyiv, Çerniğiv ve Sumı vilâyetinde Rusiye arbiyleri qalmadı, dep ayttı.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://krymrcriywdcchs.azureedge.net . Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
