Rusiye FSB-si Herson vilâyetiniñ sakininiñ tutulması aqqında haber etti. O, Rusiyede yasaq etilge "Noman Çelebicihan adına qırımtatar batalyonında" iştirak etüv ile qabaatlanğan. Bunı "Krıminform" rusiye devlet agentilgi haber ete.
Rusiye FSB-siniñ versiyasına köre, 2015 senesi dekabr ayında şübeli şahıs "Noman Çelebicihan adına qırımtatar batalyonına" qoşulğan.
2022 senesi noyabr ayında o Qırımğa kirişte Rusiye FBS hadimleri tarafından tutulğan.
Rusiye FSB-si Rusiye ceza qanunnamesiniñ 208 maddesine (qanunsız silâlı teşkilâtnıñ faailetinde iştirak etüv) binaen cinayet davası açqan. Yaqalanğan şahıs 15 yıl apis cezasına mahküm etile bile. Şimdi mahkeme qararı ile erkek tevqif etilgen. Onıñ adı ve soyadı, izaatları yoq.
Sentâbrniñ 2-nde Rusiyeniñ nezaretinde olğan Aqmescit şeeriniñ Kiyev rayon mahkemesi Ukrayina istihbaratınıñ malümatına köre, Rusiye arbiyleri tarafından Herson vilâyetinde tutıp esir etilgen qırımtatar Ayder Ümerovnı 5 yıl sert apis cezasına mahküm etken.
Qırımdaki Rusiye mahkemesi qırımtatar Artur Memetşayevni 6,5 yıl apis cezasına mahküm etti. Evel "Qırımtatar resurs merkezi" onıñ Geniçeskte tutıp esir etilgeni aqqında haber etken edi.
Rusiyeniñ nezaretinde olğan Aqmescit şeeriniñ Kiyev rayon mahkemesi Rusiyede yasaq etilge "Noman Çelebicihan adına qırımtatar batalyonında" iştirak etüv qabaatı ile Herson vilâyetinden olğan qırımtatar taksici Rustem Gugurikni 8,5 yıl sert apis cezasına mahküm etti.
Rusiye fevralniñ 24-nde Ukrayinağa büyük istilâ etti, amma istegenini alamadı, hususan ukrainalılarnıñ tirenüvi sebebinden Kyivni zapt etemedi.
Aprelniñ 22-nde Rusiye Ukrayinadaki «mahsus operatsiyanıñ» (anda büyük istilânı böyle adlandıralar) «ekinci fazası» vaqtında yañı planlar aqqında bildirdi. Rusiye arbiyleri işğal etilgen Qırımğa qara ayatını temin etmek ve Pridnestrovyege çıqmaq içün Donbas ve cenübiy Ukrayinanı kontrol altına almağa niyetlene.
Faqat, ğarbiy istihbaratnıñ malümatına köre, Donbasta Rusiye muvafaqiyetli sıñırlı ve Ukrayinanıñ küçlü tirenüvi sebebinden Rusiye ordusınıñ ğayıpları büyük.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
