Rusiye FSB-siniñ Devlet Sıñır Hızmeti, Ukraina vatandaşı, qırımtatar Rüstem Raşıdovğa “Rusiyege kiriş”ni yasaq ette. Yigit ilhaq etilgen Qırımğa qıta Ukraina tarafından kirmege istedi. Bu aqta qırımtatar milliy meclisiniñ reisi Refat Çubarov habet etti.
Onıñ malümatına köre, fevralniñ 5-inde saat 9-larda saba “Çonğar” kiriş-çıqış noqtasında rusiye quvetçileri, Herson vilâyetiniñ Novotroitskoye qasabasında yaşağan 1993 senesi doğma Ukraina vatandaşı Rüstem Raşıdovnı tutıp aldı.
Onıñ aytqanına köre, Raşıdov Bağçasarayda doğmuş tatasınıñ qorantasını yoqlacaq edi. 2014 senesi mart ayından berli o yarımadağa barmağan edi.
“Rusiye işğalcileri, Ukraina vatandaşı Raşıdov Rüstemni qanunsız aqşamğace tuttı. Rusiye FSB-siniñ hadimleri tutulğan qırımtatarnı sorğuğa çekti. Eñ çoq sual, yigitniñ Qalay (Asovskoye) Medresesinden oquğan yıllarınen bağlı edi, amma o şu oquv yurtunı daa ilhaqtan evel bitirdi”, - dep haber etti Çubarov.
Onıñ malümatına köre, kün boyu Raşıdov bir qaç kere ana-babasınen laf etip oldı. Birazdan olar kiriş-şıqış noqtasına keldi.
Çubarov, saat 21.40-ta Raşıdov ukrain nezaretteki tarafqa kelgenini bildirdi. Rusiye FSB-si yigitke “Rusiye toprağına” kirişni yasaqladı.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
