Kreml nezaretindeki Aluşta şeer mahkemesi 19 yaşındaki yerli sakinge üküm çıqardı, o, patlayıcı cihazlar ve maddeler yapmasında, taşıması ve saqlap turmasında, ve ekstremizm faaliyetine açıq çağıruvlarda qabaatlana. Bu aqta iyün 4-ünde Rusiye FSB-siniñ Qırım idaresiniñ matbuat hızmeti bildirmekte, dep yaza “Krıminform” saytı.
“Putperest mefküresiniñ tarafdarı olğan genç, diniy aitlik alâmetine köre bir taqımğa qarşı küç ve zorbalıq qullanmasına çağırtqan yazını içtimaiy ağlardaki saifesinde derc etti”, - denile betanatta.
Matbuat hızmeti, 2018 senesi iyülde Rusiye FSB-si operativ-qıdırıcı tedbirlerni kecirgende, Aluşta sakini yaşağan yerde eki elyapma patlayıcı cihazını tapqanını bildire. Olar termos ve şişe şeklinde yapılğan edi. Bundan soñ oğlan apis etilgen edi.
“Aluşta şeer mahkemesi onı qabaatlı dep tanıdı ve 1 yıl 8 ay apis cezasını ve 60 biñ rublelik para cezasını üküm etti”, - dep bildirdi FSB.
Rusiye FSB-siniñ Qırım idaresi, 19 yaşındaki Aluşta sakinine qarşı Rusiye Cinaiy Kodeksiniñ 223.1 ve 280.2 maddelerine köre cinaiy davanı açtı ve tahqiq etti. Müessisede, tahqiq vaqtında apis etilgen adam öz qabaatını tanıdı, dep bildireler. Maküm etilgenniñ ve imayesiniñ açıq tefsirleri yoq.
Rusiye FSB-si maküm etilgenniñ adı-soyadı dep bildirgen adğa Facebookta saife qayd etilgen edi. Profilde, hususan, o Aluştada yaşağanı ve evel “Azov” batalyonında snayper olğanı yazılğan.
