Rusiye FSB-si Qırım demir yolunda Ukrayina istihbaratı tarafından celp etilgen Rusiye vatandaşı azırlağan teror eylemini toqtatqanını bildirdi. Bu aqta TASS Rusiye devlet agentligi yaza.
Qayd etilgenine köre, mabüs ve onıñ ömür arqadaşı Büyük Onlar köyü civarındaki demiryolınıñ astına patlav qurulışını qoyacaq ediler.
FSB-de, yaqalanğanlar Rusiye arbiy hızmetçileriniñ yaşağan yerlerini ve ava mudafaası vastalarınıñ yerlerini fotoğa çektiler, dep bildireler.
Olarğa qarşı Federatsiyası Ceza kodeksiniñ 30 maddesiniñ 1-inci qısmı ve 205 maddesiniñ 2-nci qısmı ve 194-nci maddesiniñ 1-inci qısmına istinaden cinaiy iş açıldı.
Beyanatta mabüslerniñ adları aytılmay.
Soñki bir ay içinde bu, Rusiye quvetçileriniñ Qırımda demiryolunda toqtatılğan terakt aqqında ekinci beyanatı oldı.
2022 senesi avgust ayından başlap Qırım ve Aqyarda aman-aman er kün patlav sesleri eşitile. Rusiye akimiyeti bunı «Ukrayina uçucısızlarına» qarşı ateş ve «ava mudafaa sistemasınıñ işi» dep añlata. Qırımnıñ Rusiye yolbaşçısı Sergey Aksönov uçucısızlarnı yarımada içün «esas telüke» dep adlandırdı. 2022 senesi oktâbr ayında Qırım (Keriç) köpründe patlav oldı. Daa bir patlav 2023 senesi iyülniñ 17-nde oldı. Avgustnıñ 12-nde Rusiye akimiyeti Keriç köprüne yapılğan daa eki ücüm aqqında bildirdi. Yarımadada yüksek (sarı) terror telükesi seviyesi devam ete. Aqmescit ava limanı qapalı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://krymrcriywdcchs.azureedge.net. Esas adise-vaqialarnı Qırım.Aqiqatnıñ Telegramve İnstagram saifelerinden taqip etiñiz.
