Rusiyeniñ Kirov şeerinde salı künü, aprelniñ 2-nde, 17 yaşında cemaat faali Karim Zânçurin tutuldı. Azatlıq Radiosınıñ rus bürosı haber etkenine köre, saba saat 6-da dairesine Rusiye FSBsiniñ dört hadimi sürip kirdi, olarnen beraber eki şaat keldi. Tintüv üç saat devam etti.
Şübhe doğurğan eşyalar cedveline Boris Nemtsovnıñ «Putin. Cenk» kitabı, Mihail Hodorkovskiyniñ «Açıq Rusiye» areketiniñ basılğan malümatları ve Ukraina bayrağı kirsetildi. Bütün elektron taşıyıcılar – bilgisayar, cep telefonları, afıza kartı, malümat taşıyıcıları – «ekstremist faaliyetiniñ» delilleri olaraq ilerideki tedqiqat içün çekip alındı. Otlı çay narkotik olaraq alınacaq edi. Tintüvden soñ genç babasınen beraber FSBniñ Kirov bölügine alındı, anda üç saat devamında sorğu keçirildi.
Rusiye uquq qoruyıcı organlarınıñ malümatına köre, Karim Zânçurin VKontakte içtimaiy ağında «ekstremist malümatlarını» oquğan edi.
Tutulğan kişiniñ bildirgenine köre, o, «Narodnaya samooborona» sol radikal cemiyetine abune olğan edi. Bu cemiyetniñ abunecileri 2018 senesi oktâbrniñ 31-nde Arhangelskte olğan patlavnı muzakere etken edi. Rusiye politsiyasınıñ malümatına köre, onı 17 yaşında anarhist Mihail Jlobitskiy kerçekleştirdi. Bu adise Rusiyede terrorizmni aqlaycaq bir qaç davanıñ açılmasına sebep oldı – Jlobitskiyge qoltutqan müelliflerniñ yazılarından sebep.
Karim Zânçurin Arhangelskteki patlavnen bağlı internetteki ekstremist yazıları aqqında cinaiy iş şaatı statusını aldı. Sorğudan soñ genç yiberildi.
