«Rusiye-Frenkistan tarihiy teşebbüsler inkişafı fondunıñ» prezidenti Pyer Malinovskiy bu sene iyün ayında işğal etilgen Qırımda atiqiyat qazmalarınıñ keçirilüvi aqqında ilân etti.
Bu aqta Rusiye kontrolindeki Qırım yolbaşçısı Sergey Aksenovnıñ Qırımnıñ Rusiye medeniyet naziri Arina Novoselskayanen keçirgen iş körüşüvi aqqında aytıldı.
Malinovskiyniñ aytqanına köre, fond Qırım cenki devriniñ atiqiyat tedqiqatınen oğraşacaq. O, yarımadağa «Frenkistan mütehassısları kelecek», dep vade etti.
Fond saytındaki malümatqa köre, Pyer Malinovskiy Frenkistanda doğdı, amma 2017 senesinden berli Moskvada yaşay. Qayd etilgenine köre, fondqa Rusiye prezidenti Vladimir Putin, onıñ matbuat kâtibi Dmitriy Peskov, Rusiye Tış işler naziri Sergey Lavrov qoltutalar. Rusiye mudafaa naziri Sergey Şoygu Malinovskiyni «Elâk olğan Vatan imayecileriniñ hatırasını ebediyleştirüv» medalinen taqdirledi.
Qırım işğalinden soñ Rusiye Qırımdaki medeniy ve tarihiy emiyeti olğan bütün obyektlerni öz yurisdiktsiyası altına aldı. Kyiv, olar Ukraina halqına ait olğanını israr etip, mezkür obyektlerni UNESCO imayesi altına almağa rica ete.
UNESCO Dünya mirası cedveline işğal altındaki Qırımnıñ «Tavrik Hersones» qoruğı kirmekte. Cedvelge kirsetilecek namzetler arasında Bağçasaraydaki Hanlar sarayı, Sudaqtaki Ceneviz qalesi, Qırım astrofizik observatoriyası, Manğup Qale, Eski Kermen ve Çufut Qale barlar.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, Keriç parom keçiti, diger strategik obyektlerni zapt etip, Ukraina ordusınıñ areketlerini blok etken edi. Rusiye akimiyeti bu insanlarnıñ Rusiye ordusınıñ arbiyleri olğanını başta inkâr etken edi. Daa soñra Rusiye prezidenti Vladimir Putin bular Rusiye arbiyleri olğanını tanıdı.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
