Rusiye kontrolindeki Sudaq şeer mahkemesiniñ «fevral 26 davasınıñ» mabüsi Mustafa Degermenciniñ mahkümiyetini lâğu etüv qararı Rusiyeniñ işğal etilgen Qırımda qırımtatar halqına qarşı repressiyalarnı toqtatacaq manasına kelmey.
Böyle fikirni fevralniñ 5-nde Ukraina halq deputatı, Qırımtatar Milliy Meclisiniñ reis muavini Ahtem Çiygoz Qırım.Aqiqatqa bildirdi.
«Mahkümiyetniñ lâğu etilüvi qabaatlav lâğu etildi manasına kelmey. Bir yımşatuv ya da sensatsiya olğanını tüşünmeyim. Rusiyeniñ qırımtatar halqına qarşı deşetli repressiyalarını ğayrıdan baqmaq niyetinde olğanınıñ alâmetlerini ve rezonans körmeyim», – dedi Çiygoz.
Fevralniñ 4-nde Rusiye kontrolindeki Sudaq şeer mahkemesiniñ qadısı Mihail İvanov «fevral 26 davasınıñ» mabüsi Mustafa Degermencige qarşı sınav müddeti yekünlengenine qadar cinaiy mahkümiyetni lâğu etmege qarar aldı.
Noyabrniñ 21-nde Qırım Muhtar Cumhuriyetiniñ prokuraturası «fevral 26 davasınıñ» esnasında iştirak etken Rusiye kontrolindeki Qırım Yuqarı mahkemesiniñ eki qadısına şübheli olğanlarını bildirdi.
Kreml kontrolindeki Aqmescitniñ Merkeziy rayon mahkemesi 2018 senesi iyünniñ 19-nda «fevral 26 davasınıñ» mabüslerini şartlı apis cezalarına üküm etti. Ali Asanov ve Mustafa Degermenci 4 yıl ve 6 ay, Arsen Yunusov ve Eskender Kantemirov 4 yıl, Eskender Emirvaliyev 3 yıl ve 6 ay şartlı apis cezasını aldı, er birine 3-er yıl sınav müddeti tayin etildi.
2015 senesiniñ yanvarinde Rusiye Tahqiqat komitetiniñ Qırım idaresi fevral 26 mitingi esnasındaki kütleviy qarışıqlıqlar boyunca cinaiy iş açtı.
Tutulğanlar arasında Ukrainanıñ topraq bütünligine qoltutqanlardan: Qırımtatar Milliy Meclisi reisiniñ muavini Ahtem Çiygoz ve, ondan ğayrı, faaller Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nebiyev buluna ediler.
Daa soñra mahkeme, baş şübheli – o vaqıt Qırımda amelde Meclis lideri rolüni eda etken Ahtem Çiygoznı ayrı bir mahkeme davasına ayırıp, «fevral 26 işini» ekige böldi.
Advokat Cemil Temişevniñ teşebbüsi ile faal Talât Yunusov ve ATR telekanalınıñ operatorı Eskender Nebiyev, bergen ifadeleriniñ «fevral 26 işiniñ» diger figurantlarına qarşı delil olaraq qullanılmaycağını şart qoyıp, tahqiqatnen añlaşma yaptı ve özlerine qarşı qabaatlavlarnı tanıdılar. 2015 senesinde Talât Yunusovğa şartlı olaraq 3,5 yıl ve Eskender Nebiyevge, aynı bunıñ kibi, şartlı olaraq 2 yıl ceza müddeti berildi.
2017 senesi sentâbrniñ 11-nde Rusiye mahkemesi Çiygoznı, yarımadanıñ Rusiye tarafından ilhaqı ile bağlı narazılıqlarnı közde tutqan «kütleviy qalabalıqlarnıñ» teşkil etilmesinde qabaatlav boyunca sert rejimli koloniyada sekiz yıl apis cezasına mahküm etti. 2017 senesi oktâbrniñ 25-nde Rusiye ükümeti, Qırımda mahküm etilgen Ahtem Çiygoznı azat etip, Türkiyege teslim etti. Daa soñra o, Kyivge ketti.
