İlhaq etilgen Qırımda Sudaq yolunıñ bir qısmında kündüz yol areketi qapatılacaq. Naqliyat yürüşiniñ sıñırlavı, "Tavrida - Art 2019" Rusiye gençler festivaliniñ keçirilmesinen bağlı.
Bunı Rusiye nezaretindeki Qırım Devlet Avtomobil Teftişi bildire.
"Tavrida - Art 2019" festivaliniñ keçirilmesinden sebep, Kapsel körfeziniñ burulışı yanında Sudaq - Arqa Deresi (Mindalnoye) - Qoz (Solneçnaya Dolina) maşna yolunıñ 5+000 km - 6+000 km qısmı, avgust 20 saat 8:00 başlap, avgust 26 saat 20:00 qadar qapatılacaq. Bu arada yol areketi iştirakçilerine başqa marşrut saylamaqnı rica etemiz", - denile beyanatta.
Bundan ğayrı, "Medvejonok" plâjı yanında vaqtınca park meydançığı olacağını da bildireler.
"2019 senesi avgust 23-ünden 26-sına qadar saat 8:00 - 03:00 Sudaq avtovokzalından "Tavrida - Art 2019" festivali keçirilgen yergece avtobuslar yürecek", - dep qoştılar müessisede.
Festival saytında yazılğanı kibi, "Tavrida - Art" - Rusiyede ilk icadiy topluluqlarnıñ festivalidir. Onıñ ğayesi "Tavrida" forumınıñ mezunlarında peyda oldı.
