Boşnıñ 3-ne keçer gecesi, Rusiye ordusı raketalarnen ve bir qısmı Qırımdan uçurılğan 289 ücüm dron ile ücüm etti. Ücümniñ esas yönelişleri Kıyiv, Harkiv, Vinnitsâ, Dnipropetrovsk vilâyetleri, dep bildire telgramda Ukrayina Silâlı quvetleriniñ Ava quvetleriniñ matbuat hızmeti.
İlk malümatqa köre, saat 09:00 ava mudafaası 309 nişannı yoq etti, şu cümleden 3 ballistik raketa ve 49 qanatlı raketa, 257 BpLA (olardan 89-ı reaktiv).
Ukraina Silâlı Quvetleriniñ bildirgenine köre, 23 yerde raketa ve duşman dronlarınıñ urulması qayd etildi, 14 yerde ise parçalar tüşti.
Boşnıñ 3-nde gece Rusiye quvetleri Dnipropetrovsk vilâyetinde kritik infrastruktura obyektlerine ücüm etti. OVA malümatına köre, Dniproda Rusiye ücüminden sebep 17 insan zarar kördi, bir kişi elâk oldı.
Aynı gece Harkivge Rusiye ballistikası ve KAB tarafından ücüm etildi. Akimiyet, bir qaç yaralanğan kişi tibbiy müessisege ketirilgeni aqqında bildire, hastalar başqa hastahanelerge avuştırıla.
Jıtomır, Rivne ve Odesa vilâyetleriniñ akimiyeti energetik infrastrukturağa ücüm etilgenini bildirdi.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.