Rusiye arbiyleri İlk küzniñ 8-ne keçer gecesi Ukrayinağa gemilerge qarşı, ballistik, qanatlı raketalar ve dronlarnen ücüm etti, olarnıñ bir qısmı Rusiye Federatsiyası tarafından ilhaq etilgen Qırımnıñ Sarabuz qasabasından uçurıldı. Ücümniñ esas yönelişleri Kıyiv ve Odesa vilâyetleri oldı, dep bildirdi Ukrayina Silâlı quvetleriniñ Ava quvetleri.
Anda, RF ordusı, belli olmağan sayıda "Oniks", "İskander-M ⁇"/S-400/KN-23 ballistik raketa, 32 X-101 qanatlı raketa ve 166 uçucısız uçaq qullanğanını qayd ettiler.
Ava quvetleri, 29 yerge raketa ve ücüm dronu urulğanını, doquz yerde ise parçalarnıñ tüşkenini qayd etti.
Prezident Volodımır Zelenskıy, Ava quvetleriniñ malümatını izaatlap, Ukrayinanıñ Rusiye ballistikasına qarşılıq köstermek içün vastalarğa ihtiyacı olğanını qayd etti.
"Umumen 175 ava nişanı gece arbiylerimiz tarafından tüşürildi, amma, yazıq ki, episi degil. Qanatlı raketalarnıñ pek yahşı neticelerine baqmadan, hususan ballistikada qıyınlıqlar bar, ve er kün ortaqlarımızğa buña ihtiyacımız olğanını isbatlaymız. Bu aqta Amerikalılar ve Avropalılarnen laf ettik, ve dbugün teminlev ve FREYJA antibalistik sistemamızğa yardım ete bilecek devlet ve şirketlerniñ temsilcileri ile körüşüvler olacaq", — dep qayd etti devlet yolbaşçısı.
Rusiye arbiyleri Ukrayina regionlarına muntazam sürette ücüm ete, çeşit silâ qullana – uçucısız, raketa, KAB, reaktik toplu atış sistemaları.
Ukrayina akimiyeti ve halqara teşkilâtlar bu darbelerni Rusiye Federatsiyasınıñ arbiy cinayetleri olaraq tasnif ete ve olarnıñ maqsadı bar, dep qayd ete.
İnsanlarnı elektrik energiyası, sıcaq, su, bağ, tibbiy yardım ve yaşayış içün diger kerekli şaraitlersiz qaldırmaq içün eali yaşayışını teminlev sistemaları ve sağlıq müessiselerine qarşı ateşler genotsid areketleriniñ alâmetlerini taşıy.
Rusiye reberligi Rusiye ordusı büyük cenk vaqtında Ukrayinanıñ şeer ve köylerinde vatandaş infrastrukturasına qarşı darbe endirgenini, vatandaşlarnı öldürgenini ve hastahane, mektep, bala bağçaları, energetika ve suv obyektlerini yıqqanını inkâr ete.